Lu solarpunk è un muvimentu di narrativa fantàstica, arti, moda e attivìsimu ca cerca di arrispùnniri e ncarnari la dumanna “comu fussi na sucitati sustinìbbili, e comu cci arrivamu?”

L’estètica dû solarpank junci lu pràtticu cû beḍḍu, lu bonu pruggittatu cû virdi e rigugghiusu, lu lustrusu e culuratu cû sìmplici e sòlitu.

Lu solarpunk po èssiri utòpicu, simplicimenti uttimìsticu o pruccupatu pî lotti pi criari un munnu megghiu, ma mai distòpicu.

Mentri ca lu nostru munnu è sempri cchiù ‘n putiri dî calamitati, zoccu ni giuva sunnu suluzziuna, nun sulu abbirtimenti. Suluzziuna pi pruspirari senza cummustìbbili fòssili, pi manijari equamenti la scarsizza riali e spàrtiri nta l’abbunnanza mmeci di suppurtari la scarsizza fausa e l’abbunnanza fausa, pi èssiri cchiù gintili ntra di nuiautri e cû chianita ca spartemu.

Lu solarpunk è ô stissu tempu na visiuni dû futuru, na pruvucazzioni pinzanti, na manera di campari e nu nzemi di pruposti rialìstichi pi ragghiùnciri ḍḍu futuru.

  1. Semu solarpunk picchì l’uttimìsimu ni fu livatu e stamu pruvannu a ricupirallu.
  2. Semu solarpunk picchì l’ùnici autri aḍḍijuti sunnu la nigazziuni o la dispirazziuni.
  3. Â basi, lu solarpunk è na visiuni di un futuru ca ncarna lu megghiu ca l’umanitati po ragghiùnciri: un munnu post-scarsizza, post-girarchìa, post-capitalìsticu unni l’umanitati si vidi comu parti dâ natura e l’enirgìa pulita sustituisci li cummustìbbili fòssili.
  4. Lu «punk» nte solarpunk riguarda la ribbilliuni, la contracurtura, lu post-capitalìsimu, la diculunizzazziuni e lu ntusiàsimu. Àvi a chi fari cû jiri nta na dirizziuni diversa rispettu ô mainstream, ca sta jennu sempri cchiù assai nta na dirizziuni scantusa.
  5. Lu solarpunk è tantu un muvimentu quantu è un gèniri: nun si tratta sulu di stori, ma macari di comu putemu rializzalli.
  6. Lu solarpunk cumprenni na sfunnacata di tàttichi: nun cc’è sulu na manera giusta di fari solarpunk. Mmeci, diversi cumunitati di tuttu lu munnu nni adòttanu lu nomu e li pinzati e custruìscinu nicchi di rivuluzziuni autusufficenti.
  7. Lu solarpunk furnisci na pruspittiva nova e prizziusa, un paradimma e un vucabbulariu pi discrìviri un futuru pussìbbili. Mmeci di abbrazzari lu retrufuturìsimu, lu solarpunk talìa cumpletamenti ô futuru. No un futuru autirnativu, ma un futuru pussìbbili.
  8. Lu nostru futurìsimu nun è nichilista comu a chiḍḍu dû cyberpunk e scanza li tinnenzi putenziarmenti quasi riazziunari dû steampunk: riguarda lu ncignu, la ginirativitati, la nnipinnenza e la cumunitati.
  9. Lu solarpunk suttalinia la sustinibbilitati ammintali e la giustizzia suciali.
  10. Lu solarpunk àvi a chi fari câ risciduta di maneri pi rènniri la vita maravigghiusa nta stu mumentu e macari pî ginirazziuna ca ni sicutarannu.
  11. Lu nostru futuru hâ cumprènniri lu riusu e la trasfurmazziuni di zoccu avemu già. Mmàggina sbarazzàrisi dî “citati ntilliggenti” a favuri dâ citatinanza ntilliggenti.
  12. Lu solarpunk arricanusci la nfruenza stòrica ca la pulìtica e la fantascenza ànnu avutu una supra a l’autra.
  13. Lu solarpunk arricanusci la fantascenza nun sulu comu sìmplici ntrattinimentu, ma puru comu na furma di attivìsimu.
  14. Lu solarpunk voli cuntrastari li scinari di na terra murenti, di na diffirenza nzuvirchiàbbili ntra ricchi e pòviri e di na sucitati cuntrullata di curpurazziuna. No ntra cintinara di anni, ma ora.
  15. Lu solarpunk riguarda la curtura maker dî jùvini, li suluzziuna lucali, li riti enirgètichi lucali, li maneri di criari sistemi di funziunamentu autònumi. Riguarda l’amuri pû munnu.
  16. La curtura solarpunk cumprenni tutti li curturi, riliggiuni, abbilitati, li sessi, li gèniri e l’identitati sissuali.
  17. Lu solarpunk è l’idea di l’umanitati ca ragghiunci n’evuluzziuni suciali ca abbrazza nun sulu la sìmplici tulliranza, ma na cchiù cumpleta cumpassiuni e accittazziuni.
  18. L’estètica visiva dû solarpunk è raputa e ‘n evuluzziuni. Nta stu mumentu è n’ammiscata di:
    1. Era dâ navigazziuni a vela e dû mitu dâ fruntera ottucintiscu (ma cu cchiù assai bicicletti)
    2. Lu riusu criativu dî nfrastrutturi esistenti (ê voti post-apucalìtticu, ê voti cuntimpuraniu-streusu)
    3. Tecnuluggìa appriupiata
    4. Stili Liberty
    5. Hayao Miyazaki
    6. Nnuvazziuni ‘n stili «jugaad» dî pajisi nun-punintini
    7. Back-end high-tech cu risurtati sìmplici e puliti
  19. L’ammienti custrujuti dû solarpunk su’ ispirati ê principi dû Neurbanìsimu ô dû Neupidunalìsimu e dâ sustinibbilitati ammintali.
  20. Lu solarpunk cuncipisci n’ammienti custrujutu adattatu criativamenti pi, ntra l’autri cosi, sfruttari lu guadagnu sulari usannu diffirenti tecnuluggìi. L’ubbittivu è prumòviri l’autusufficenza e campari intra finaiti naturali.
  21. Ntô solarpunk ni firmammu giustu ‘n tempu pi frinari la lenta distruzziuni dû nostru chianita. Ni nzignammu a usari la scenza cu saggizza, pi ammigghiurari li nostri cunnizziuna comu parti dû nostru chianita. Nun semu cchiù capi supremi. Semu assistenti. Semu jardinari.
  22. Lu solarpunk:
    1. è variu
    2. àvi spazziu pâ cuisistenza di spiritualitati e scenza
    3. è beḍḍu
    4. po succèdiri. Ora

La Cumunitati Solarpunk

Traduttu di Salvatore Longhitano

Quest’opera è distribuita con Licenza Creative Commons Attribuzione – Condividi allo stesso modo 4.0 Internazionale.